Rikardo Arregi Diaz de Heredia-Arestiren argazki zuri-beltz...

http://pkeizagirre.podomatic.com/entry/2008-01-06T01_55_41-08

Irakurlea: Pako Eizagirre

Azkenez eman zioten zure izena

Bilboko karrika bati, auskalo nork esango duen orain

Arestin bizi dela, eta errazegia litzateke

gugan bizi zarela esatea.

 

Bilbo zuri-beltz langartsu bat dakusat

zurekin pentsatzen dudan bakoitzean

gerraondoko Bilbo hotz eta triste bat,

egunero bulego txiki eta goseti batera joaten

aspaldian ez dituzte leihoak garbitu

eta hautsa pilatzen da zenbakiz beteriko paper horixketan,

 

Dena zuri-beltza, antzinako filmen antzera,

jendea zuri-beltza, zuri-beltza hiria,

zuri-beltzak apaizen liburuak,

argazki zuri-beltzak, zuri-beltzak etxeak.

Belarra berdea zen zure garaietan?

Gabardinak, txapela eta euritako beltzak,

euskaltzaleen bilera astun eta antzuak,

beldur zuri-beltza, iritziak zuriak edo beltzak.

 

Oskarbia ikusi zenuen noizbait?

 

Zurekin menditik jaitsi ginen maldan behera,

mila esker, inoiz ez naiz mendizale izan,

erakutsiko nizuke gustura birla, eta bertan oasiak,

nola mugitzen garen teknikolorean, eta gerra berriak.

 

Ai, Malgizon Arestiar,

txistulariak dira oraindik Euskal Herrian

nagusi, ugazaba eta epaile,

euskaldun jendeak artalde izatean jartzen du esperantza

eta eztabaida aspergarriek etengabe diraute,

bizien artean, ez izan zalantzarik,

eskumikatua izango zinateke.

 

Gutxi daukat zuretzat, eta horregatik

inoiz baino apalago,

inoiz baino zuri-beltzago,

ene lehen karta izan zena

eskaintzen dizut zure Karta,Jokorako:

 

Gabriel Aresti eta gero Segurola

euskaldunen artean sugarrezko bola,

maldan behera garaman haize zirimola,

bihotzez mintzatu zen, ireki kaiola,

ez dakigu nola

galdu zen odola,

bihurtu arbola,

gaitezen kontsola

umezurtz gara baina ez zaigu axola.


 

Rikardo Arregi